Ch’al foss gnü ca critiches, ataches brutales, y ince val’stlaf bas, ch’al m’âi bëgn aspetè. I m’à tut dant da ne jì mai cuntra les pursones, mo ma cuntra les ideees. Respetè porsones y natöra, chësc fêji y chësc m’aspeti ince dai atri. Valgönes conscideraziuns (ince chëra de Adi Demetz) tles ultimes Usc ne me dà nia la poscibilité da scutè. Dandadöt oressi dì ch’i a intres metü tröp impëgn tla gestiun dla Union Generela di Ladins dla Dolomites, cun idealism y vëia de fa, y mai ponsan a n secundo fin. Por ci che reverda spo la cuestiun politica, oressi dì che le sotscrit à porvè da portè ite na maiù sensibilité ambientala tl movimënt politich “Ladins Dolomites”. I ne sun nia stè bun. Al é sigü plö saurì da portè ite na buna ladinitè sinziera y daverta ti Vërc – i pröms relutac é bele sot man. Mi pinsiers de cultura, lingaz, identité ladina ne s’à nia mudé. Le movimënt ne sënt nia assà valgügn problems che nes sta dassën a cör. Herbert Prinoth y iö sun cuntra les speculaziuns. Sun pur n vire plö chît y cuntra n trafich zënza limitaziuns söi jûs, i sun por le respet dl ambiënt y cuntra n raiun de n raiun produtif de passa 6.000 m3 a Mirì S.Martin; i sun cuntra i ampliamënc di hotì söla Munt de Suc. Ciudì che nos sun POR la Mont de Suc. Che n’é nia di Vërc y nia di cöci, nia di ladins y nia di todësc. Mo de düc! Nos aratun che n ladin sides n bun ladin nia ciodì che al é scrit ite pro n partì che porta l’inom “Ladins”, mo ciodì che al è na bona porsona, sensibla y respetosa. Spo él tanco anfat sc’al é fosch o bröpm o vërt, o sce al se mët n papagai söl cé.

michil costa, Usc di Ladins 02.08.08