N bel resultat al concurs scrit fora dala Maratona dles Dolomites tles scores sot al moto dla ediziun de chësc ann “energia”.

Cultura – Inće en chësc ann à le Comitê dla Maratona dles Dolomites orü fà l’esperiënza che â portè a n bun resultat l’ann passè sot al proiet “L bosch – fontana de vita”. En chësc êl gnü metü sön mësa le tema “energia”, n tema spës y ampl, modern y vedl sciöche l’umanité y la vita. Dan da chinesc dé él gnü metü da jì les premiaziuns di scolars y dles scolares, diretamënter tles cores de Fascia (öna na premiaziun), Gherdëna (öna na premiaziun) y Val Badia (te trëi scores).

“Energia” sostegnida
Inće en chësc ann él gnü metü da jì le concurs cun le sostëgn dl Assessour ala cultura ladina, dl dr. Florian Mussner, dal Intendënt dles scores ladines dr. Roland Verra, y sambëgn cun la partezipaziun di mituns y dles mitans dles scores elementares y mesanes.

Concurs de poesies
Le laur de chësc ann é stè chël da scrì na poesia individuala sön le tema “energia”, desco forza renovabla/da dla natöra; energia naturala y personala, energia intenüda sciöche forza dl’anima. Le concurs i ê gnü resservé ai mituns y ales mitans dles scores ladines primares (3a, 4a y 5° tlassa) y mesanes (1a, 2a y 3° tlassa). Vigni scolar/scolara à podü partezipé individualmënter y la poesia à podü gnì scrita te vigni lingaz (ladin, talian, todësch, ingleje). I laurs é gnüs valutà da na comisciun de poeć, maestri, direturs y dal’organisazion dla Maratona dles Dolomites aladô di criteres dl contegnü, dla originalité, dla forma, dl lingaz y dl messaje. Premié él gnü le miù laur individual por les trëi categories por vigni valada ladina. Implü él inće gnü premié le miù laur assolut por vigni categoria. Vigni scolar che à tut pert al concurs à ciafè dal’organisazion dla Maratona n pice recort por süa partezipaziun.

Scolars/scolares premià/ades
1a categoria: 3-4 tlassa elementara:
Val Badia – davagnadëssa de categoria: Lisa Tasser, IV tlassa Scora Elementara Badia
Fascia – davagnadëssa assoluta: Veronica Mamone, III A Scora Elementara Poza de Fascia

2a categoria: 5 tlassa elementara – 1 tlassa mesana:
Val Badia – davagnadëssa de categoria: Julia Moling, V tlassa Scora Elementara La Val
Gherdëna – davagnadù de categoria: Daniele Senoner, I tlassa Scora Mesana Sëlva de Gherdëna
Fascia – davagnadù assolut: Luigi Riz, V tlassa Scora Elementara Ćianacëi

3a categoria: 2-3 tlassa mesana:
Val Badia – davagnadëssa de categoria: Veronica Rungger, III B Scora Mesana Al Plan
Gherdëna – davagnadù assolut: Alexander Bottone, II A Scora Mesana Sëlva de Gherdëna
Fascia – davagnadù de categoria: Corinne Sommavilla, III F Scora Mesana Ćiampedel.

La Usc Di Ladins N. 19/2009, 23 de ma 2009