Düć messunse tó en conscideraziun na vita plö “ecosostenibla”. Nos düć mangiun sö plö energia co ći che nosc planët é bun da fà.
I me feji demorvëia che l’Ombolt da Corvara dijes che n daz sö por i jus podess ester na bona soluziun. Al foss ora da capì che nos ne sun nia susc sön chësc monn! Vigni sort de ajiamënt (incuinamënt) – inće acustich – ti tol cualité a nosta vita. Na mobilité alternativa nes dëida fà stè damî nos ostis, i arpizadus, les umes cun sü mituns, düć i sciori, düć i ciüfs y düć i tiers! La jënt se fajess demorvëia: stlüje i jus por n valgönes ores al dé “ai confi ns dl patrimone mondial dl’umanité” – foss n gran suzes mediatich.
I me feji demorvëia che i boteghiers y ostis da Corvara se baudies dla stlüta al trafi ch di auti te nosc paisc.
I ne me feji degöna morvëia che le presidënt di ostis de Südtirol baies de spostamënć de cubatöra ignoran l’importanza de n’etica tl turism.
I ne me feji degöna morvëia ch’i motoziclisć se copa.
I ne me feji degöna morvëia che nosta jënt n’é nia plö contënta.
I me feji demorvëia ch’an ne capësces nia ćiamo l’importanza de n turism de chi dala roda.
I me feji demorvëia ch’an alda intres plö üties sö por munt cun intres plö musiga disco y tecno y intres plö dadalt.
I ne me feji degöna morvëia che i ùn manco sciori chësc ann.
I me feji davëi demorvëia che döt chësc me fejes ćiamo demorvëia.

michil costa, La Usc di Ladins nr. 30 dl 8 de agost 2009