Al e intres morjel, pragmatich y carismatich, le governadu Durnwalder. Dan da puch al de n’intervista baian son i jus dolomitics. So pinsir la dij lungia son sua sensibilite ambientala.

– sua afermaziun “i turisć n’e nia a ona” – ndr sola stluta – e avisa fora de mosora. Tlermenter n’a le chef degona intelligenza turistica y ne conesc gnanca les tendenzes de marće

– al sostegn le poiet dl tunel de basa dl Prener, mo cun gran morveia – sua y nosta – vegnel a nes cunte ch’al manćia i scioldi por les zirconvalaziuns de Corvara y Selva. Al me gniss da ri sc’i ne messass nia pite

– al dij: “i ombolć stlujes po i jus. Spo nen respognarai inće”. Pu ći el pa, na manaciada? Dal’atra pert ne n’el nia bun da nes de na resposta al infer che i messun vire vigni de soi jus y so insom les pizes – la vera roia ćina soles pizes plo altes!

– les Dolomites patrimone dl’Umanite n’e nia de propriete dl Sudtirol – y gnanca dl Venet. Les nuze ma por bate cassa e l’enejima demostraziun de na oduda corta y de ofenuda al ambient. Tlermenter e n daz n pol d’atraziun. Al e tler che jon a paie se sint le motoziclist ćiamo plu autorise a fa les gares cun i motors

– le President dij: “i n’o nia na mendranza che se lamentes ćiudi ch’ara se sint isolada”. Massa comot da ti ascute so ai ladins canch’ara ti va bun y savaie de nia canche nos se damanun atenziun

Al foss gran ora che le President i dess usc a idees plo modernes, a pinsiers plo nobli. Platon baia dla planuda dles lerites. La vita che va amesa la lerite y la beleza fora. La beleza e assoluta. N valur universal. Les Dolomites e beleza! Ma les porsones cun valurs universai scri plates nia plo da desmentie de storia. Le President mess mude strada sc’al orara gni recorde inće ti proscimi agn ćiamo scioche na porsona dales vijiuns che e onestes y che dora tl temp. Al a ćiamo val’ poscibilite: ite Antersasc – Lungiaru – vegnel fat ite na gran strada. Ciers y lersc vedli de cenć y cenć d’agn, cun ches beles raisc, dot vegn trat fora, spache, zenza respet y zenza sensibilite. Le president Durnwalder, che tegn pa tan son i ladins, podess ji a archite le dann che ti vegn fat chisc dis a un di plu bi raiuns dla Val Badia.

michil costa, La Usc di Ladins, Nr. 28/2010 – 24 de messel 2010