Tuta de posiziun en cunt dla “Orcena dal’edema” publicada dan otedé, dal titul “Tradiziuns descraditades”

Mea culpa. Le dr. Lois Trebo a critiche che le guant da paur ne toca nia da gni visti por fa “scenografi a”.Al a rajun. Mea culpa. I damani pordenanza por avei ofenu la dlijia y na pert di ladins cun la “noza ala Maratona”. Mea culpa.

L’intenziun n’e nia chera da orei fa n scandal. Le sotscrit se ciafa i complimenć – che mess gni porta inant a duć i volontars, a nosc comite y ales porsones che laora cun nos dot l’ann por la Maratona, en primis nosc Claudio Canins cun sua sciabla Cindy Vittur. Le sotscrit va incerch a se mostre brao, a mete sua musa te vigni foliet y a baie da sciche te radio y televijiun y mess de conseguenza inće to so les critiches (al e pa begn ause, al n’a ćiafe tantes chisc ultimi agn, ch’al tegn pa begn fora val’) y les responsabilites. Chesc feji sambegn.

Sce la tradiziun ladina e gnuda descreditada spo el mia y ma mia gauja. I sun y i me senti n ladin, i sun ste a će dla Union Generela, i a tres porve a comuniche l’importanza de nosta ladinite. Motifs assa por savei canche se mostre ca a na certa manira po devente n’ofenuda a nosta cultura. Mo co era pa sozeduda che les porsones s’a presente ala partenza dla Maratona cun le guant da paur? Roberta Mellauner, patrona dla Majun, me telefoneia y me dij ch’ara a aldi ch’al n’e dui che se marida ala Maratona. Ara se metess a desposiziun por ti de n pu’ de coru ala bela impormetuda d’amur. Mia colpa e stada de ne splighe nia avisa de ći ch’al se trata, chi dui s’a bele maride te comun dui dis denant, inscioma: i e dot content. Mo i a ponse massa puch. Roberta y sues porsones s’a tut dlaorela de gni ala partenza, ares y ai a tut ca so temp por nes daide; dot ći ch’ares y che ai a fat e gnu fat en bona fede. Mi dilan por chestes porsones e gran y sinzier. Mi respet por eres y por ei, y por dotes les porsones meti io al prom post te mia vita. Inće mi respet por Lois Trebo e gran. Al m’a insigne der trop, i a tres ćiare cun morveia so impegn por nosta cultura ladina, sua cultura e grana. Propi por chesc gran savei me feji begn dassen demorveia ch’al s’infi da da lasce publiche n’orcena cun na foto de porsones. La foto e po bele gnuda publicada tla ultima Usc.

Chesta e inće na manćianza de respet. Vei el che la tradiziun ladina se mirita respet, mo nia manco respet se mirita les porsones che porta le guant. Da mia pert ti menarai na letra ofiziala de pordenanza a dotes les istituziuns, ales lies culturales, ala dlijia. I sun sigu che le dr. Trebo fajara le medemo cun Roberta Mellauner y sues compagnes y compagns.

michil costa, La Usc di Ladins, Nr. 28/2010 – 24 de messel 2010