Co che n projet umanitar, metù en pe te nostes monts da la “Costa Family Foundation”, é bon de judé la jent tibetana tles monts dl’India. Chisc dis azion nueva sun eBay (internet) con sciche testimonials personalités dal mond dla mujiga, dl spetacul y dla scritura

Atualité – Na lìzita de benefizienza sun eBay dal moto “momenc speziai con personaji conescius” é l’idea che la “Costa Family Foundation” dl Hotel La Perla a Corvara à abù per atré l’atenzion mediatica y la partezipazion dl maiour numer de jent per cueie adum contribuc per finanzié la costruzion de n ostel per mutans muciadives tibetanes.

 Anter les persones prominentes che met a desposizion n sie apel per l’azion zivila y umanitara dla Familia Costa y te n secunt moment sie temp, él da ciafé Roberta Armani, Vittorio Brumotti, Mario Cipollini, Mauro Corona, Ennio Doris, Roby Facchinetti dei Pooh, Zucchero Fornaciari, Gad Lerner, Linus, Giovanni Rana, Enrico Mentana y Beppe Severgnini.

La lìzita online, pieda via al 31 de merz 2011 y che va inant chisc dis, funzioneia enscì che jent possa jì sun internet, se cliché ite sun la plata http://members.ebay.it/ws/eBayISAPI.dll?ViewUserPage&userid=costafoundation y ofrì l plu che an vuel.
Michil Costa dla “Costa Familiy Foundation” spera de podei tré ite tant de ofertes per ruvé a la soma de 7,507,950.00 Rupie (€ 125.132,50 zirca) che va bujen per realisé chest setim projet de sia fondazion: la costruzion de na ciasa ostel (alberch) de trei auzedes per mutans tibetanes, sciampedes da l’oprescion cineisa, per vive en pesc a Dharamsala, tl nord dl’India. Da compré tres la lìzita (chi che pfresc l plu) él pesć metus a deposizion da les personlités instesses, pesć che ne vegn nia mesurés con scioldi, ma con temp y desponibelté, y ence chest é sté volù da la Fondazion, al dess ester na contrapartida simbolica. Enscì darà ca Zucchero la poscibelté de podei tò pert en esclusiva a la preparazion de si tour nuef, Linus lasciarà ester prejent l davagnadour de sia lìzita a la direta de si program radiofonich, Ennio Doris darà ca l’ospitalité tla senta dla Mediolanum, Beppe Severgnini poponarà na roda tla redazion dl Corriere della Sera y na marena con el dant a n bon gote de vin.

La legreza de daidé

“Da mont a mont, da chiet a chiet, àuden l rì arjenté dles pitles perles. Sie s’la rì y si soms s’à la Costa Family Foundation tout a cuer, y jan do a la signoura Madame Jetsum Pema, sor de sia Santité l XIV Dalai Lama”, scri la familia Costa te n si comunicat, y inant: “forsc sarà l aier plu sitì, l ciel plu ble y les ciases plu deslisses, ma i mutons tibetans à inoms che impermet n davegnì, à uedl che ciala dlvers dla pesc y à mans per costruì amor. De pitles perles che sarà forsc n dì l proscim Dalai Lama, forsc n pest nobel o forsc genitors straordinars.” Con chisc pensiers rengrazieia la Fondazion dla Familia Costa la jent che spen valch per judé i mutons tibetans.

L projet da judé con la lìzita

I laours à bele metù man l ultim meis de jenà. L ostel nuef fej pert di Tibetan Children’s Villages (TCV), cheriés tl’India l 17 de mà 1960 do l’ocupazion cineisa dl Tibet; la TCV é na organisazion de ciarité olache i mutons tibetans mucés, vif en pesc y tla sigurté. Entratan él le TCV deventé l plu gran corp autonom dla comunité tibetana. Les scoles desferentes TCV, spanudes fora soura duta l’India, é endut dejenuef y dutes reconesciudes per sia formazion auta y efizienta. Chestes strutures é ence n simbol sterch per i tibetans en esil, per l’arjonta dl’ambizion a l’educazion aldò de sia cultura.

La Usc di Ladins, 01/04/2011

VA ALA LÌZITA!