En sabeda ai 25 de jügn él gnü tignì tl Hotel La Perla a Corvara la terza serada de benefiziënza a bëgn dl popul tibetan, sostegnì dala Costa Family Foundation
|
|
|
| Michil Costa cun Jetsun Pema, la só dl Dalai Lama…. |
Corvara – Ala serada à tut pert 130 porsones. Tut pert à inće la só dl Dalai Lama Jetsun Pema y le rapresentant dl Dalai Lama tl’India Tempa Tsering. Les donaziuns gnüdes ite da chësta serada é de 13.690,00€. Mo al é inće stè porsones che n’ê nia presëntes ala serada, y à impò orü contribuì al proiet. Chëstes à fat spënores por indöt 8.040,00€. La lotaria y les donaziuns lëdies à arjunt na soma de 7.185,00€. Insciö él gnü coiü adöm bëgn 28.915,00€. Les spëises dla serada nia sponsorisades ê de incër 4.000,00€. Por mirit dl Secretariat Sozial dla RAI él inće gnü a s’l dè l’aziun di SMS de solidarieté, inviada ia danter i 20 y i 26 de jügn. Rovè ite él (dat nia ćiamò ofizial) 5.862 cherdades, da chëres che an s’aspeta apresciapüch 13.425,00€. Tres dötes les aziuns él insciö garatè la bela soma de apresciapüch 42.340,00€. Cun chëstes spënores porta inant la Costa Family Foundation le setim proiet, che prevëiga da fà sö n istitut por les ëres a Dharamsala, tla India dl nord, che ti pitarà lerch a 80 jones tibetanes danter i 14 y i 16 agn. Le proiet à n valur de 125.130,00 euro.